Сообщение №23298445

Слышаще державы твоея российския нестроение и видя христиан, поношение, непрестанно молился еси, да спасет царица преблагая Русь православную, сего ради похвальными песньми воспеваем ти таковая: Радуйся, пречистыя державный учителю; радуйся, чести икон ея ревнителю. Радуйся, в молениих за люди своя предстателю; радуйся их под державный покров ея вручителю. Радуйся, Христа ради чашу страданий испивый; радуйся, измену до конца простивый. Радуйся, молитвы кадило благовонное; радуйся, лампадо веры неугасимая. Радуйся, Николае, Боговенчанный Царю и великий страстотерпче! Видя яко кротость и смирение во обращение не успевает, все упование на мати Божию возложил еси и в руце Вседержителя всего себе предал еси, да и безумныя вразумит во еже пети тебе: Радуйся, буйствующая гордыни победителю; радуйся, венца смиренный носителю. Радуйся, немощных стено необоримая; радуйся, к людем своим любовь преизобильная. Радуйся, чудесами в России Богом превознесенный; радуйся, в разсеянии сущими прославленный. Радуйся, за Россию жертво усердная; радуйся, славяном сердце милосердное. Радуйся, Николае, Боговенчанный Царю и великий страстотерпче! Ветии многовещании, яко рыбы безгласныя, не возмогут возрещи высоту твоего терпения, мы же глубину падения нашего созерцающе, в сокрушении духа восклицаем: Радуйся, мужество необоримое; радуйся, верносте непоколебимая. Радуйся, кающихся совершенное прощение; радуйся, упорствующих долготерпение. Радуйся, завет царствующего отца соблюдавый; радуйся, пред царем царей обет сохранивый. Радуйся, Богу послушливый вельми; радуйся, нелицемерный в любви. Радуйся, Николае, Боговенчанный Царю и великий страстотерпче!