Anopheles Pictus№-8692884 „3“

Како любити Бога от всея душа, тако же брата своего и страх Божии имети и память смертную

Посем же возлюбиши Господа Бога твоего от всея душа своея и подвигни вся твоя дела и обычаи и нравы угодная творити по заповеди Его, паки жи искреняго си возлюби всякаго человека по образу Божию созданна рекше всякаго християнина, страх Божии всегда имеи в сердцы своем, и память смертную всегда волю Божию творити, и по заповедем Его ходи рече Господь в чем тя застану в том и сужу, ино достоит всякому християнину готову быти в добрых делех в чистоте и в покоянии и во всяком исповедании всегда чающе часа смертнаго.

Како к церквам Божиим и в монастыри с приношением приходити

А к церквам Божиим всегда с верою приходити с приношением с свечею и с просфирою с фимияном и с ладоном, с каноном, и с кутьею и милостынею и за здравие и за упокои и к празником, и по монастырем тако с милостынею и с приношением приходити егда принесеши дар свои ко олтарю воспоминаи еуаггельское слово егда нечто имать брат твои на тя остави ту дар свои пред олтарем и шед смирися з братом своим прежде, тогда принеси дар свои к Богу от праведнаго своего имения от неправды неприятна милостыня к силным речено бысть луче не грабити неже милостыня даяти от неправды отдаи обидимому приятнее милостыни, а к Богу приятна милостыня от праведнаго стяжания и от добрых дел.

Како священников и иноков в дом свои призывати молитися

Кипа в которые любо празники по обещанию своему да призывают священническии чин в дом свои елико по силе, и молебная совершают о всяком прошении и молят за царя и великаго князя имярек всея Руси самодержца, и за его царицу и великую княгиню имярек, и за их благородныя чада, и за братью его и за боляре, и за все христолюбиво воиньство иже победу на враги и о плененых свободе, и о всем священническом и иноческом ящаго, а от стола или от трапезы ества и питие таино износити или высылати не по повелению настоящаго и без благословения святотаство суть и самочиние таковых всячески бесчествуют, егда зван будеши ким на брак не седи на преднем месте егда кто честнее тебе будет званных им и пришед иже тебе звавыи оного речет ты даждь сему место, и тогда начнеши со студом посьледнее место держати но егда зван будеши шед сяди на последнем месте, да егда приидет звавыи тя и речет ти друже посяди выше, тогда будет ти слава предвозлежащими с тобою, яко всяк возносяися смирится а смиряися вознесется егда на трапезе предпоставят ти многоразличныя яди и пития егда кто честнее тебе будет званных не начни вкушати преже ничто же, аще ты начальстьвен будеши, предпоставленую ядь разсужая начинаи. У неких боголюбцев изообилно бывает вкушение и питие и излишнее цело снимают, и вперед иным на потребу пригожается и аще кто нечювьствен, и не искусен и не учен, и невежда не рассуждая всякаго брашна в пресыщения начинает, и небрегомо творит, будет и сам поруган и посмеян и обещестен от Бога и от человек.